പ്രൊഫസര് രത്തന് പരിമുവിന്റെ സ്റ്റഡീസ് ഓണ് ദ ആര്ട്ട് ഓഫ് രാജ രവി വര്മ്മ , കേരള ലളിതകലാ അക്കാദമിയുടെ പ്രസിദ്ധീകരണമാണ്. രവി വര്മ്മ ചിത്രങ്ങളുടെ പ്രത്യേകതകള്, അതിലെ പ്രാദേശിക സ്വാധീനം, പാശ്ഛാത്യ സ്വാധീനം എന്നിവ വിലയിരുത്തുന്നതാണ് ഈ രചന. ബറോഡ രാജാവിനു വേണ്ടി പുരാണ കഥകളെ അടിസ്ഥാനമാക്കി രചിച്ച ചിത്രങ്ങള്, ഛായാചിത്രങ്ങള് എന്നിവയെല്ലാം രത്തന് ചര്ച്ച ചെയ്യുന്നുണ്ട്. രവിവര്മ്മ രചിച്ച ശൃംഗാര രസം മുന്നിട്ടു നില്ക്കുന്ന ചിത്രങ്ങള് കൂടുതല് ആകര്ഷണീയമാണെന്ന് രത്തന് അഭിപ്രായപ്പെടുന്നു. അര്ജ്ജുന-സുഭദ്ര, വിശ്വാമിത്ര-മേനക, ശന്തനു-മത്സ്യഗന്ധ,രാധമാധവ തുടങ്ങിയവ ഉദാഹരണം. എന്നാല് ശന്തനുവിനെ ഉപേക്ഷിക്കുന്ന ഗംഗയും ദമയന്തിയെ ഉപേക്ഷിക്കുന്ന നളനും നല്കുന്ന രസം ശോകം നിറഞ്ഞതാണ്. കഥാസന്ദര്ഭങ്ങളുടെ മുഴുവന് ഭാവവും ഉള്ക്കൊള്ളാനുള്ള രവിവര്മ്മയുടെ ചാതുരിയെപറ്റി രത്തന് പ്രത്യേകമായി പറയുന്നുണ്ട്.
രവിവര്മ്മയുടെ വലിയ കാന്വാസ് ചിത്രങ്ങള് വേണ്ടത്ര ചര്ച്ച ചെയ്യപ്പെട്ടിട്ടില്ല. മോഹിനി-രുഗ്മാംഗദ ചിത്രത്തിലെ പ്രകാശവിന്യാസം ഏറെ ശ്രദ്ധേയമാണെന്ന് രത്തന് അഭിപ്രായപ്പെടുന്നു. കഥാപാത്രങ്ങളുടെ സ്ഥാനനിര്ണ്ണയത്തിലും വേഷഭൂഷകളിലും നല്ല ശ്രദ്ധ ചെലുത്തിയിട്ടുണ്ട് വര്മ്മ. പുരാണ കഥാപാത്രങ്ങളുടെ വേഷഭൂഷണങ്ങളിലെ ആഢംബരവും ദരിദ്രരുടെ വേഷവും ദൈന്യതയുമെല്ലാം ഒരേ ഏകാഗ്രതയോടെ ചിത്രീകരിക്കാനുള്ള കഴിവാണ് വര്മ്മയ്ക്കുണ്ടായിരുന്നത്. കൂടുതല്പേരുടെ പങ്കാളിത്തമുള്ള ചിത്രങ്ങളില് ഒരു ക്യാമറമാന്റെ ലെന്സ് കണ്ണുകള് വര്മ്മയ്ക്കുണ്ടായിരുന്നു.
രവിവര്മ്മ ചിത്രങ്ങളിലെ നാച്വറലിസത്തെക്കുറിച്ച് ആനന്ദ കുമാര സ്വാമികളുടെയും മറ്റും വിമര്ശനങ്ങള് അടിസ്ഥാന രഹിതമാണെന്ന് ഗ്രന്ഥകാരന് പറയുന്നു. നാച്വറലിസത്തെ അനുകൂലിച്ചും പ്രതികൂലിച്ചും എഴുതപ്പെട്ട ലേഖനങ്ങളും ഗ്രന്ഥകാരന് ഇതില് കൊടുത്തിട്ടുണ്ട്. ഹാവല്,ശ്യാം ചരണ് ശ്രിമാനി, ബലേന്ദ്ര നാഥ് ടാഗോര്, രാമാനന്ദ് ചാറ്റര്ജി, കുമാര സ്വാമി, സുകുമാര് റോയ്, രത്തന് പരിമു എന്നിവരുടെ വിലയിരുത്തലുകളാണ് കൊടുത്തിട്ടുള്ളത്. കളറിലും ബ്ലാക്ക് ആന്റ് വൈറ്റിലുമുള്ള 46 ചിത്രങ്ങളും ഈ പുസ്തകത്തില് കൊടുത്തിട്ടുണ്ട്. രവിവര്മ്മ ചിത്രങ്ങളെ കുറിച്ച് കൂടുതല് അറിയാന് ആഗ്രഹിക്കുന്നവര്ക്ക് ഉപകാരപ്രദമാണ് ഈ ഗ്രന്ഥം.
No comments:
Post a Comment