Sree Prakash’s 'Me and My Palette' - an excellent composition

 

Sree Prakash’s  'Me and My Palette'  - an excellent composition 

S.N.Sreeprakash ,the grandson of G.Kochukrishna pillai,who was a great painter, and the son of another painter ,G.Narayana kurup, was born in Karunagapally, Kollam district, Kerala and lived his creative life in the land of Andaman Island. Prakash is an artist who reached the island by travelling like a driftwood. He reached Andaman in 1986, was held there by the magnetic allure of the sea, forest, soil ,its flora, fauna and the people. 35 years of government service and artistic life have made Prakash a part of Andaman. Prakash's book 'Me and My Palette' is the memory, life, words, lines and colors of that place.

 

 Prakash reached Port Blair by ship from Madras and found his place there. The changes and development of the Andaman and Nicobar Islands, its people and the country as a whole have been written in a beautiful manner. Sea hawks, seagulls, ships, boats and Port Blair from 35 years ago come before us through pictures. The old era is seen alternating in black and white and the new era in color. The natural beauty of Andaman and Nicobar is experienced not only through pictures but also through his poetic writing.

 

 Andaman is the land of rain. Prakash, who set foot there 35 years ago, keeps fond memories of  Andaman rains. Kids rejoicing the drops, people walking with umbrellas, riding bicycles and two-wheelers wearing raincoats, passengers in taxis and  housewives collecting dry clothes before the spell. Perhaps the artist saw it as a climate connecting Andaman with his native land.

 

 Prakash's Andaman career began in 1986 as a teacher in Little Andaman. He describes the lifestyle of the Bengalis living there, the moments he spent with them, the journey through the beaches and the friendship with the fishermen. Prakash also describes how the 2004 tsunami destroyed the Pearl of the Sea. He also says that despite many losses, she has not lost her charm. Prakash describes his visit to Little Andaman in 2018 with nostalgia.

 

 While walking through the Marina Park, the writer feels the whisper of the lovers, the accounts of the conflicts in life and the sighs of the freedom fighters who were victims of the brutality of the British. Prakash, who is also a novelist, beautifully paints the story of the pain and torture of Indians and the happy life of the British through the dialogue between a small red stone from Viper Island, where those who opposed the British and those who tried to escape from the island were hanged, and a stone washed ashore from Netaji Subhash Chandra Bose Island. Although the island is beautiful, it tells us how horrible life was for the Indians who were destined to be the islanders.

 

 Rose Island was the base of the British. Here they constructed a church, a tennis court, a dance court and a bar. The writer notes that the tragic life of the tribals, the misery of the exiles and the brutality of the British are intertwined in the stories told by their remains. I visited Andaman in 2010 as a guest of Sreeprakash. Subsequently, in 2011, a documentary was made about the cellular prison. Prakash also played the role of an artist who painted pictures capturing the feelings of the freedom fighters who were brutalized in the prison. The documentary gained international attention. Pictures drawn during that time are also part of the book. Those intense images could haunt us as much as thousands of words.

 

 Prakash notes that the period 1987-90 in Car Nicobar was also an occasion for the composition of many good paintings and fond memories. Image of a tribal Jarawa,Shompen  and  limestone cave form part of the palette. The story of making friends with the wind in Mayabandar is also told. Collections of paintings in the hands of many in India and abroad say that Sreeprakash is a painter who made friendship not only with the wind but also with every sensations of  Nature’s bounty.

 

 One  will feel like going on a journey through the paths travelled by Prakash when reading this book. Diglipur, Kalipur Beach, Car Nicobar, Campbell Bay and Pygmalion Point are all attractions. Even after 35 years, every day, every sight on this little Island gives him a new vibe. Prakash ends his writing by opening his eyes to the scenes of Andaman, which has survived the Covid era, becoming active again.

 

 Conjuring up paintings, travel, history and life in a nutshell, this book is undoubtedly  ornament  the library of any individual or institution👌

S.N.Sree Prakash – M- 9434284602

Complete dramas of Edava Shukkur

സമൂഹത്തിന് നേരെ പിടിച്ച കണ്ണാടികള്‍

-ഇടവ ഷുക്കൂറിന്‍റെ നാടകങ്ങളുടെ  ഒരാസ്വാദനം

                                                                                                

                                             നാടകങ്ങളെ പൊതുവെ അമച്വര്‍ എന്നും പ്രൊഫഷണല്‍‍ എന്നും പരീക്ഷണ നാടകങ്ങളെന്നുമൊക്കെ തരം തിരിക്കാറുണ്ട്. ഇടവ ഷുക്കൂറിന്‍റെ നാടകങ്ങളെ ഇത്തരത്തില്‍ ഏതെങ്കിലുമൊരു ചങ്ങലയില്‍ കുരുക്കിയിടാന്‍ കഴിയില്ല എന്നതാണ് ഈ നാടകങ്ങളുടെ പ്രത്യേകത. ഗള്‍ഫ് നാടുകളിലും കേരളത്തിലും അരങ്ങേറുന്ന ദുഷ്ചെയ്തികള്‍ക്കെതിരെ തൂലിക പടവാളാക്കിയുള്ള പ്രതിഷേധ പ്രകടനങ്ങളാണ് ഷുക്കൂറിന്‍റെ രചനകള്‍.മനുഷ്യര്‍ ജീവിതം ആരംഭിച്ച നാള്‍ മുതല്‍ നന്മയും തിന്മയും തമ്മിലുള്ള പോരാട്ടമുണ്ട്. അത് എന്നും പലരീതിയിലും ആവര്‍ത്തിക്കപ്പെടുകയും ചെയ്യുന്നു.ഈ നന്മ തിന്മകളുടെ പോരാട്ടമാണ് ഷുക്കൂറിന്‍റെ രചനകളിലെയും കാമ്പെന്നു പറയാന്‍ കഴിയും. ധനവും സ്ത്രീയുമാണ് എന്നും സമൂഹത്തിലെ പ്രധാന ആകര്‍ഷണങ്ങളായി മാറുന്നത്.ഇതില്‍ പ്രണയവും പകവീട്ടലും കാമവും ഇടകലരുന്നു. ഈ ഇടകലര്‍ന്ന ജീവിതമാണ് ഷുക്കൂര്‍ പ്രമേയമാക്കുന്നതും.പാത്രസൃഷ്ടിയില്‍ ശ്രദ്ധേയമായ ഒതുക്കവും മാനസ്സിക അപഗ്രഥനവും നടത്തിയിട്ടുണ്ട് എഴുത്തുകാരന്‍. വായനയ്ക്ക് മാത്രമായല്ല ഷുക്കൂര്‍ രചന നിര്‍വ്വഹിച്ചിരിക്കുന്നത്. രംഗത്ത് അവതരിപ്പിക്കാന്‍ കൂടിയാണ്. അതുകൊണ്ടുതന്നെ പാത്രസൃഷ്ടിയില്‍ ഒരു ഹാസ്യതാരം കൂടി അവതരിപ്പിക്കപ്പെട്ടിരിക്കുന്നത്. നര്‍മ്മം കലര്‍ന്ന ഭാഷണത്തിലൂടെ പല കഥാപാത്രങ്ങളും സമൂഹത്തില്‍ ചാക്യാരുടെ പങ്കാണ് നിര്‍വ്വഹിച്ചിരിക്കുന്നത്.

നാടകങ്ങളില്‍ അവതരണരീതികൊണ്ട് ഏറ്റവും ആകര്‍ഷണീയമായത് കുടീചരനാണ്. കുടീചരന്‍ എന്നാല്‍ ഗൃഹകാര്യങ്ങള്‍ പുത്രനെ ഏല്‍പ്പിച്ചിട്ട് സന്ന്യാസം സ്വീകരിക്കുന്നവന്‍ എന്നാണര്‍ത്ഥം. ഈ നാടകത്തില്‍ ചുടുകാട് വാസുവാണ് കുടീചരന്‍. എന്നാല്‍ അയാളുടെ സന്ന്യാസം ജീവിതമോഹങ്ങള്‍ ത്യജിച്ച ഒരാളിന്‍റേതല്ല, മറിച്ച് ധനമോഹവും കാമവും അന്ധവിശ്വാസവും ഇടകലര്‍ന്ന ജീവിതമാണ് അയാള്‍ നയിക്കുന്നത്. മണ്ടന്‍ മൊയ്തു എന്ന തമാശക്കാരനും മക്കളായ പ്രേമനും ഡോക്ടര്‍ സുമവും സുമയുടെ കാമുകന്‍ രാജനും വേശ്യയായ മീനാക്ഷിയും കേന്ദ്രകഥാപാത്രങ്ങളാവുന്ന കുടീചരന്‍റെ പശ്ചാത്തലവും അവതരണം ആധുനിക നാടകത്തിന്‍റെ രീതിയിലാണ്. എന്നാല്‍ പ്രൊഫഷണല്‍ നാടകത്തിന്‍റെ മേമ്പൊടികള്‍ ചേര്‍ന്നിട്ടുമുണ്ട്. ശരിക്കും ഒരാക്ഷേപഹാസ്യ നാടകം. സന്ന്യാസത്തെ തട്ടിപ്പാക്കി ജനത്തെ വശീകരിക്കുകയും നശിപ്പിക്കുകയും ചെയ്യുന്ന അനേകം ആശ്രമങ്ങള്‍ ഇപ്പോഴുമുള്ള കാലത്ത് ഈ നാടകത്തിന്‍റെ പ്രസക്തി കുറയുന്നില്ല എന്നതും പ്രത്യേകം പ്രസ്താവ്യമാണ്.

മറ്റൊരു പ്രധാന നാടകം ആരാച്ചാരാണ്. പ്രശസ്ത എഴുത്തുകാരി കെ.ആര്‍.മീര ആരാച്ചാരെ അവതരിപ്പിക്കും മുന്‍പ് തന്നെ ആരാച്ചാരുടെ ജീവിത സംഘര്‍ഷങ്ങള്‍ അവതരിപ്പിച്ച എഴുത്തുകാരനാണ് ഷുക്കൂര്‍.നിരപരാധിയായ ഏകമകനെ തൂക്കിക്കൊല്ലാന്‍ നിയമിക്കപ്പെട്ട ആരാച്ചാര്‍ അഴകപ്പന്‍റെ ഹൃദയവ്യഥയ്ക്കൊപ്പം രാഷ്ട്രീയത്തിലെ മാലിന്യങ്ങളും തുറന്നുകാട്ടാന്‍ ഷുക്കൂറിന് കഴിഞ്ഞിട്ടുണ്ട് ഈ രചനയില്‍. ശരിയും തെറ്റും നന്മയും വക്രബുദ്ധിയുമൊക്കെ സംഘര്‍ഷത്തിലാവുന്ന നാടകത്തിലൂടെ രാഷ്ട്രീയരംഗത്തെ വികലമനസ്സുകളെ തുറന്നുകാട്ടുകയാണ് ഷുക്കൂര്‍. രാഷ്ട്രീയക്കാരെ അവതരിപ്പിക്കുമ്പോള്‍ ഷുക്കൂറിന്‍റെ രക്തം തിളയ്ക്കുന്നത് നമുക്കനുഭവപ്പെടും. അധികാരത്തിനും പദവി നിലനിര്‍ത്താനുമായി നീചപ്രവര്‍ത്തികള്‍ ചെയ്യുന്ന രാഷ്ട്രീയക്കാരുണ്ട് എന്ന സത്യം നമ്മെ വീണ്ടും വീണ്ടും ഓര്‍മ്മപ്പെടുത്താന്‍ ഈ നാടകം ഉപകരിക്കുന്നു. അവതരണത്തിലുള്ള പുതുമ ഇവിടെയും നമുക്ക് ദര്‍ശിക്കാന്‍ കഴിയും.

ഭ്രമണം എന്ന നാടകത്തിന്‍റെ പ്രമേയം സാധാരണമാണെങ്കിലും അവതരണ പശ്ചാത്തലം ഗള്‍ഫ് നാടാണ് എന്നത് പ്രത്യേകതയാണ്. ഭര്‍ത്താവിനും കാമുകനുമിടയില്‍ സംഘര്‍ഷത്തില്‍പ്പെട്ടുഴലുന്ന വന്ദന എന്ന സ്ത്രീയുടെ കഥയാണ് ഭ്രമണത്തില്‍ പറയുന്നത്. ഗള്‍ഫ് ജീവിതത്തിന്‍റെ പൊങ്ങച്ചങ്ങളും ഗള്‍ഫ്കാരന്‍റെ വിവാഹത്തിലെ സങ്കീര്‍ണ്ണതകളും ഇതിന്‍റെ ഭാഗമാണ്.ഗള്‍ഫിലെ പണപ്പിരുവുകളും ഇത്തിള്‍ക്കണ്ണികളുടെ ജീവിതവുമെല്ലാം ചിത്രീകരിക്കുന്നുണ്ട് ഈ നാടകത്തില്‍.മാപ്പുതരൂ എന്ന നാടകം ഗള്‍ഫില്‍ ചോരനീരാക്കുന്ന ഒരു മകന്‍റെയും സ്വാര്‍ത്ഥനായ ബാപ്പയുടെയും ജീവിതമാണ് അവതരിപ്പിക്കുന്നത്. നമ്മുടെ ഗ്രമങ്ങളില്‍ 1980-90കളില്‍ ഉണ്ടായിരുന്ന അപകടകരമായ സാമൂഹിക ജീവിതത്തിന്‍റെ നേര്‍ചിത്രമാണ് മാപ്പുതരൂ. മകന്‍റെ പണം കണ്ട് അഹങ്കരിക്കുന്ന ബാപ്പയും അയാളുടെ അഹംഭാവത്തെയും അഹങ്കാരത്തെയും ചൂഷണം ചെയ്യുന്ന ഫൈനാന്‍സിയേഴ്സ് ഉടമയുമാണ് ഇതിലെ ശക്തമായ കഥാപാത്രങ്ങള്‍. നല്ല മുനയും ഉറപ്പുമുള്ള സംഭാഷണങ്ങളാണ് നാടകത്തിലുടനീളം. മുസ്ലിം സമുദായത്തിലെ ദുര്‍ബ്ബലയായ സ്ത്രീയെയും ശക്തയായ സ്ത്രീയെയും ഇതില്‍ അവതരിപ്പിക്കുന്നു. ഒന്നിലേറെ വിവാഹം കഴിക്കുന്നതിനും വഴിതെറ്റി ജീവിക്കുന്നതിനും മതനിയമങ്ങളെ ഉപയോഗപ്പെടുത്തുന്നതും ഇതില്‍ കാണാന്‍ കഴിയും. എല്ലാ മേഖലയിലും നന്മ തിന്മകളുടെ പോരാട്ടമുണ്ടെന്ന് നമുക്കറിയാം. ആശുപത്രികളിലും നമുക്കിത് കാണാന്‍ കഴിയും. അത്തരമൊരു കാഴ്ചയില്‍ നിന്നാണ് നിറങ്ങള്‍ എന്ന നാടകം ഉദയം ചെയ്തിരിക്കുന്നത്. കര്‍മ്മനിരതനായ ഡോക്ടര്‍ ചന്ദ്രനും ദുര്‍മ്മാര്‍ഗ്ഗിയായ ഡോക്ടര്‍ തോമസ്സും ഇതില്‍ കേന്ദ്രകഥാപാത്രങ്ങളാകുന്നു. ഇന്നും ഡോക്ടര്‍മാര്‍ക്കിടയില്‍ ഇത്തരം സംഘര്‍ഷങ്ങള്‍ നിലനില്‍ക്കുന്നത് നമുക്ക് കാണാം.

ആദിവാസി ചൂഷണം എഴുത്തുകാരുടെ ശ്രദ്ധയില്‍ എന്നും സജീവമാണ്. അത്തരത്തില്‍ രാഷ്ട്രീയ നേതാവിന്‍റെയും ആദിവാസി മൂപ്പന്‍റെയും ചൂഷണങ്ങള്‍ക്ക് ഇരയാകുന്ന സമൂഹത്തിന്‍റെ കഥ പറയുന്ന നാടകമാണ് വെള്ളിമലക്കാട്.ഇതില്‍ ആദിവാസി ഭാഷ പരമാവധി ഉള്‍ക്കൊള്ളിക്കാന്‍ ഷുക്കൂര്‍ ശ്രദ്ധിച്ചിട്ടുണ്ട്. ആശയ സംഘര്‍ഷങ്ങളും ഏറ്റുമുട്ടലുകളും സ്റ്റേജിനെ സജീവമാക്കുന്ന നാടകമാണിത്. കേട്ടാല്‍ അറപ്പുതോന്നും വിധം കുത്തഴിഞ്ഞ ജീവിതം നയിക്കുന്ന ഒരു മുതലാളിയുടെ ജീവിതകഥ പറയുന്ന നാടകമാണ് ദര്‍ശനം. സ്റ്റേജിന്‍റെ സാധ്യതകള്‍ പരമാവധി വിനിയോഗിക്കത്തക്കവിധം തയ്യാറാക്കിയിട്ടുള്ള നാടകത്തില്‍ പ്രൊഫഷണല്‍ നാടകത്തിന്‍റെ എല്ലാ മസാലകളും ഉള്‍ച്ചേര്‍ന്നിരിക്കുന്നു.

ദുബായില്‍ ആഡംബര ജീവിതം നയിച്ച് നശിച്ചിട്ടുള്ള ഒരുപാട് പേരുടെ കഥകള്‍ കേട്ടിട്ടുണ്ട്. അത്തരമൊരു കഥയാണ് ജീവിതം തേടിയിലുള്ളത്. രാജശേഖരന്‍ എന്ന ബിസ്സിനസ്സുകാരന്‍റെ ഉയര്‍ച്ച താഴ്ചകള്‍ , പണമുള്ളപ്പോള്‍ ചുറ്റും കൂടിനിന്ന മനുഷ്യര്‍ അതെല്ലാം നഷ്ടമാകുമ്പോള്‍ ഉപേക്ഷിച്ചു പോകുന്ന അനുഭവം, ഒക്കെയും മനോഹരമായി ചിത്രീകരിച്ചിട്ടുണ്ട് ഈ നാടകത്തില്‍. കൊല്ലം പട്ടണം പശ്ചാത്തലമാക്കി തയ്യാറാക്കിയ നിശ എന്ന നാടകം ശ്രദ്ധേയമാകുന്നത് നീതിപീഠവും വ്യവസ്ഥിതിയും തമ്മിലുള്ള സംഘട്ടനത്താലാണ്. ദുര്‍ബ്ബലയായ ഒരു പെണ്‍കുട്ടി ഏല്‍ക്കേണ്ടി വരുന്ന ആഘാതവും കഥയുടെ കാതലാണ്. എയര്‍പോര്‍ട്ടിലെത്തുന്ന വിദേശമലയാളികള്‍ കസ്റ്റംസുകാരില്‍ നിന്നും അനുഭവിക്കുന്ന ദുരിതങ്ങള്‍ സംബ്ബന്ധിച്ച് എന്നും ചര്‍ച്ച നടക്കാറുണ്ട്. ഈ മേഖലയില്‍ നടക്കുന്ന തട്ടിപ്പുകളും സത്യസന്ധരായ യാത്രക്കാര്‍ അനുഭവിക്കുന്ന പ്രശ്നങ്ങളും കടുത്ത ഭാഷയിലാണ് ഷുക്കൂര്‍ കസ്റ്റംസ് എന്ന നാടകത്തിലൂടെ അവതരിപ്പിക്കുന്നത്. അവിടെയും നന്മയുടെ ഭാഗത്ത് കല്യാണിയും തിന്മയുടെ ഭാഗത്ത് ജയരാജും  കഥാപാത്രങ്ങളാവുന്നു. ഒടുവില്‍ നന്മ ജയിക്കുന്നു.

ഗള്‍ഫിലെ ദുരിതപൂര്‍ണ്ണമായ ജീവിതവും തൊഴിലില്ലാതെ ക്യാമ്പുകളില്‍ കഴിയുന്നവരുടെ ആശങ്കകളും മാനസ്സിക സംഘര്‍ഷവും പറയുന്ന നാടകമാണ് തീരം തേടുന്നവര്‍. കുഞ്ഞാലി എന്ന നന്മയുടെ പ്രതീകവും മനോരോഗിയായ കലാകാരനും കൂട്ടുകാരും ഡോക്ടറുമൊക്കെ ഓര്‍മ്മയില്‍ തങ്ങിനില്‍ക്കുന്ന കഥാപാത്രങ്ങളാണ്.ഇത്തരത്തില്‍ പതിനൊന്ന് നാടകങ്ങളുടെ സമാഹാരം വായിച്ചു തീരുമ്പോള്‍ ഈ നാടകങ്ങള്‍ ഗള്‍ഫില്‍ മാത്രമല്ല കേരളത്തിലും അരങ്ങേറേണ്ടവയായിരുന്നു എന്ന് നമുക്ക് തോന്നുക സ്വാഭാവികം.ഓരോ നാടകവും വ്യത്യസ്തതകൊണ്ട് ശ്രദ്ധേയമാവുന്നു എന്നതാണ് എടുത്തു പറയേണ്ട കാര്യം. പ്രഭാത് ബുക്സാണ് പുസ്തകം പ്രസിദ്ധീകരിച്ചിട്ടുള്ളത്. 900 രൂപയാണ് വില. 

Kashmir enna swapnabhoomi

കശ്മീര്‍  എന്ന  സ്വപ്ന ഭൂമി

പി.ആര്‍.വിജയലക്ഷ്മിയുടെ  “കശ്മീര്‍ എന്ന സ്വപ്നഭൂമി “യാത്രാവിവരണം എന്ന സാഹിത്യ ശാഖയിലല്ല, യാത്രാനുഭവം എന്ന പട്ടികയിലാണ് അവര്‍ തന്നെ ഉള്‍പ്പെടുത്തിയിരിക്കുന്നത്. ശരിക്കും അത് അന്വര്‍ത്ഥമാക്കുംവിധമുള്ള സംഭാഷണങ്ങളും പ്രതിധ്വനികളുമാണ് ഈ പുസ്തകം നമുക്ക് തരുന്നത്. സാധാരണ യാത്രാവിവരണം എഴുതുന്നവര്‍ ചരിത്രവും ഭൂമിശാസ്ത്രവുമൊക്കെ കണ്ടെത്തി വായനക്കാരനില്‍ പരമാവധി അറിവ് പകര്‍ന്നു നല്‍കാന്‍ ശ്രമിക്കുമ്പോള്‍ വിജയലക്ഷ്മി  കാറ്റും പൂക്കളും മഞ്ഞും മണവും ജലവും ഭക്ഷണവും തന്ന് കശ്മീരിലെ നിസ്സഹായരും പാവങ്ങളുമായ ജനങ്ങള്‍ക്കൊപ്പം നമ്മെ കൊണ്ടുപോവുകയാണ്. സൌന്ദര്യാസ്വാദകയായ എഴുത്തുകാരിക്ക് അവിടത്തെ പ്രകൃതിയെയും സുന്ദരന്മാരെയും സുന്ദരികളെയും വാഴ്ത്താന്‍ വാക്കുകളില്ലാതെ വരുമ്പോള്‍ ഭൂമിയിലെ സ്വര്‍ഗ്ഗം ,അതിതാണ്,അതിതാണ് എന്നു പറയുകയല്ലെ എഴുത്തുകാരി എന്ന് തോന്നിപ്പോകും. പ്രൊഫ.മധുസൂദനന്‍ നായര്‍ അവതാരികയില്‍ പറയുംപോലെ “പറക്കും പരവതാനിയിലേക്ക് കയറൂ,പറക്കൂ എന്നോടൊപ്പം കശ്മീരിലേക്ക്” എന്ന് കഴിഞ്ഞ നൂറ്റാണ്ടില്‍ മിസിസ്സ് .സി.ജി.ഡ്രൂസ് നമ്മെ ക്ഷണിച്ചെങ്കില്‍ ഏതാണ്ട് അമ്മട്ടിലാണ് വിജയലക്ഷ്മിയുടെ ക്ഷണവും.

                 ഭാഷയുടെ പരിമിതികള്‍ മറികടന്ന് കശ്മീരികളുമായി നടത്തുന്ന സംഭാഷണവും കൈമാറുന്ന സ്നേഹവുമാണ് ഈ പുസ്തകത്തിന്‍റെ മാധുര്യം. ഫറൂഖ് എന്ന മിതഭാഷിയും ഗുലാംജിയും കാദിര്‍ ഭയ്യയും ഹുസൈനും നസീറും രാജയെന്ന കുതിരപോലും മനോഹരമായി ആശയവിനിമയം നടത്തുന്നു. പ്രായത്തിന്‍റെ പരിമിതികള്‍ കടന്ന് വിജയലക്ഷ്മി ഒരു കുട്ടിയായും കൌമാരക്കാരിയായും വളരുന്ന ഒരുപാട് നിമിഷങ്ങള്‍ ഇതിലുണ്ട്. സുഖമില്ലാതെ ഒററയ്ക്കിരിക്കുമ്പോഴുള്ള ഭയവും തീവ്രവാദികളെക്കുറിച്ചുള്ള ചിന്തയുമൊക്കെ ഒരു ചെറുകഥയുടെ ഓരങ്ങളിലൂടെ നമ്മെ കൊണ്ടുപോകുന്നു. ലിദര്‍ നദിയും ദാല്‍ തടാകവും ഗുര്‍മാര്‍ഗ്ഗുമെല്ലാം കണ്ടും തൊട്ടും അറിഞ്ഞ പ്രതീതി. നിരീക്ഷണങ്ങളും അഭിപ്രായങ്ങളുമെല്ലാം മറയില്ലാതെ കടന്നു വരുമ്പോള്‍ പൌരബോധമുള്ള ഒരു നേതാവിന്‍റെ സ്വഭാവവും എഴുത്തുകാരി കാണിക്കുന്നുണ്ട്. കേരളത്തിലെ ശൌചാലയങ്ങളുടെ അഭാവവും കശ്മീരിലെ വൃത്തിയുള്ള ശൌചാലയങ്ങളുമായുള്ള  താരതമ്യം, ഭക്ഷണം നല്‍കുന്നതിലുള്ള മര്യാദകള്‍, ഹോട്ടലുകളിലെ പെരുമാറ്റം, മനുഷ്യരുടെ കളങ്കമറ്റ സമീപനങ്ങള്‍ ഒക്കെയും കശ്മീരിലേക്ക് നമ്മെകൂടി ആകര്‍ഷിക്കുന്ന കാന്തശക്തിയുള്ള വാക്കുകളാണ്. മനോഹരമായ ഫോട്ടോഗ്രാഫുകള്‍ പുസ്തകത്തിന്‍റെ ആകര്‍ഷണീയത കൂട്ടുന്നു. കവര്‍ ഗ്ലോസി പേപ്പറിന് പകരം “മാറ്റ്” ആയിരുന്നു നല്ലത് എന്നു തോന്നി.

പതിനൊന്നു വര്‍ഷം ദല്‍ഹിയില്‍ ഉണ്ടായിരുന്നിട്ടും കാലാവസ്ഥയെക്കുറിച്ചുള്ള അകാരണമായ ഭയം കാരണമാണ് ഞാന്‍ കശ്മീരില്‍ പോകാതിരുന്നത്. ഇനി ശരിക്കും യാത്രയ്ക്കുള്ള തയ്യാറെടുപ്പുകള്‍ ആരംഭിക്കാം എന്നു തീരുമാനിക്കാന്‍  എഴുത്തുകാരി സഹായിച്ചു. ഈ പുസ്തകമാകട്ടെ വഴികാട്ടി. ഈ വഴികളിലൂടെയെല്ലാം സഞ്ചരിക്കണം. സംഗീത വിരുന്നുകള്‍ നഷ്ടമായേക്കാം,മറ്റെല്ലാം അനുഭവവേദ്യമാകുമെന്നു കരുതാം. കശ്മീര്‍ യാത്ര ചെയ്യാന്‍ ആഗ്രഹിക്കുന്നവര്‍ക്ക് കരുതലായി കൈയ്യില്‍ വയ്ക്കാവുന്ന പുസ്തകമാണ് കശ്മീര്‍ എന്ന സ്വപ്നഭൂമി. ആവാച്യമായ അനുഭൂതിയോടെ വായിച്ചു തീര്‍ത്ത പുസ്തകം. യാത്രയ്ക്കിടയില്‍ ഉണ്ടാവുന്ന പ്രയാസങ്ങളും സ്വാനുഭവത്തിന്‍റെ വെളിച്ചത്തില്‍ വിശദീകരിക്കുന്നുണ്ട് ഈ കൃതിയില്‍. തണുപ്പ് അധികം ഏറ്റാലുണ്ടാകാവുന്ന വിശപ്പില്ലായ്മയുടെ അവസ്ഥ ഭീകരമാണ്. അതിനായി പിപ്പല്യാസവം കരുതണം എന്നൊരു പ്രതിരോധരീതിയും പറഞ്ഞുതരുന്നുണ്ട്. യാത്ര വേഗം അവസാനിച്ചുവോ എന്നു തോന്നിപ്പോയി, വായന കഴിഞ്ഞപ്പോള്‍. യാത്രാസംഘത്തിലെ അംഗങ്ങളെപ്പോലെ ഞാനും അല്പ്പസമയം മൌനിയായി ഇരുന്നുപോയി.

കാലം ഇത്രയും ദുരിതങ്ങള്‍ അനുഭവിപ്പിക്കത്തക്കവിധം ഈ ജനത എന്തുപിഴച്ചു എന്നൊരു ചോദ്യവും മനസ്സില്‍ ഊറിവന്നു.പ്രശ്നങ്ങള്‍ സൃഷ്ടിക്കുന്നവര്‍ക്ക് കരുണാമയന്‍ മാപ്പുകൊടുക്കട്ടെ എന്ന് എഴുത്തുകാരിക്കൊപ്പം ഞാനും പ്രാര്‍ത്ഥിക്കുന്നു. (ഡിസി ബുക്സ് പ്രസിദ്ധീകരിച്ച പുസ്തകത്തിന് 125 രൂപയാണ് വില. എഴുത്തുകാരിയുടെ നമ്പര്‍-- 9020596287) 

MINNU

മിന്നു

ലളിതാ ലെനിന്‍ എഴുതിയ ബാലസാഹിത്യ കൃതിയാണ്  മിന്നു. മിന്നു എന്ന മഞ്ഞക്കിളിക്കുഞ്ഞിന്  അനുസരണയില്ലാത്ത സഹോദരന്‍ കാരണം ഉണ്ടാകുന്ന അപകടങ്ങളാണ് കഥയില്‍ പറയുന്നത്. സഹോദരന്‍റെ മരണവും മിന്നു വേടന്‍റെ കെണിയില്‍ പെടുന്നതുമാണ് കഥയുടെ ആദ്യഭാഗം. പിന്നീടവള്‍  ഒരു പെണ്‍കുട്ടിയുടെ വാത്സല്യഭാജനമായി വിദേശത്തേക്ക് പോകുന്നു. അവിടെവച്ച് വളര്‍ച്ചയുടെ  ഒരു ഘട്ടത്തില്‍  യജമാനത്തിക്ക് അവളില്‍ താത്പ്പര്യം നഷ്ടപ്പെടുന്നു. മിന്നു അവിടെ ചില പക്ഷിച്ചങ്ങാത്തങ്ങളുണ്ടാക്കുന്നു. ഒടുവില്‍ യജമാനത്തി നാട്ടിലേക്ക് മടങ്ങി വരുമ്പോള്‍ അവളെ വിദേശത്ത് ഉപേക്ഷിച്ചു വരുവാന്‍ തീരുമാനിക്കുന്നു. എന്നാല്‍ മിന്നു അവരുടെ കപ്പലില്‍ ഒളിച്ചു കയറി നാട്ടില്‍ മടങ്ങിയെത്തുന്നു. അവള്‍ അച്ഛനമ്മാമാരെ അന്വേഷിച്ചിറങ്ങി ,ജീവിച്ചിരിക്കുന്ന അച്ഛനെ കണ്ടെത്തുന്നു. എല്ലാ മനുഷ്യജീവിതങ്ങളുടെയും പോലെ സുഖദുഃഖസമ്മിശ്ര ജീവിതമാണ് പക്ഷിക്കുഞ്ഞിനും ഇതില്‍  നല്‍കിയിരിക്കുന്നത്. തൂവലുകള്‍ നിറഞ്ഞ ശരീരമുള്ള പക്ഷിക്കുഞ്ഞിന് നുണക്കുഴിയുണ്ടെന്നൊക്കെ പറയുന്ന ചില കാര്യങ്ങള്‍ ഒഴിവാക്കിയാല്‍ നല്ല വായനാനുഭവം നല്‍കുന്നതാണ് കൃതി. 1999ല്‍ ഒന്നാം പതിപ്പായും 2008ല്‍ രണ്ടാം പതിപ്പായും ബാലസാഹിത്യ ഇന്‍സ്റ്റിട്യൂട്ട് ഇറക്കിയ പുസ്തകത്തിലെ ചിത്രങ്ങള്‍ വരച്ചിരിക്കുന്നത് ടി.ആര്‍.രാജേഷാണ്

The state in theory and practice

The  State  In  Theory  and  Practice 

ഹരോള്‍ഡ്.ജെ.ലാസ്കിയുടെ പ്രസിദ്ധമായ ഗ്രന്ഥങ്ങളില്‍ ഒന്നാണ്  The state in theory and  practice”.കാലത്തെ അതിജീവിക്കുന്ന ഒരു ഇതിഹാസ രചന എന്നിതിനെ വിശേഷിപ്പിക്കാവുന്നതാണ്. ലാസ്കി, ബ്രിട്ടീഷ് പൊളിറ്റിക്കല്‍ സയന്‍റിസ്റ്റും എക്കണോമിസ്റ്റും എഴുത്തുകാരനും ലക്ചററുമായിരുന്നു. 1926 മുതല്‍ ലണ്ടന്‍ സ്കൂള്‍ ഓഫ് എക്കണോമിക്സ് &പൊളിറ്റിക്കല്‍ സയന്‍സില്‍ പ്രഫസറായിരുന്നു ലാസ്കി.. Karl  Marx, Democracy in crisis,The American presidency, The Rise of European liberalism  എന്നിവ മറ്റു പ്രധാന കൃതികളാണ്.

ഫാസിസവും കമ്മ്യൂണിസവും സോഷ്യലിസവും ജനാധിപത്യവുമുള്‍പ്പെടെയുള്ള ഭരണ സംവിധാനങ്ങളുടെ വികാസ പരിണാമങ്ങള്‍ ഇഴകീറി പരിശോധിക്കുന്ന കൃതിയാണ്  ദ സ്റ്റേറ്റ്. സോഷ്യലിസത്തിന്‍റെ സാധ്യതകളും പോരായ്മകളും അദ്ദേഹം കൃത്യമായി ഈ കൃതിയില്‍ പ്രതിപാദിക്കുന്നു.

1945-46ല്‍ ബ്രിട്ടീഷ് ലേബര്‍ പാര്‍ട്ടിയുടെ  ചെയര്‍മാനായിരുന്ന ലാസ്കി സായുധ വിപ്ലവത്തിലൂടെ തൊഴിലാളികളുടെ ഭരണം ഇംഗ്ലണ്ടില്‍ വരണമെന്ന് ആഗ്രഹിച്ചിരുന്നു. എന്നാല്‍ ലേബര്‍ പാര്‍ട്ടിതന്നെ അദ്ദേഹത്തിന്‍റെ  അഭിപ്രായത്തെ തള്ളിപ്പറയുകയാണുണ്ടായത്. നെഹ്റുവിനെയും  കൃഷ്ണമേനോനെയും  ഏറെ സ്വാധീനിച്ച  സോഷ്യലിസ്റ്റായിരുന്നു ലാസ്കി. കെ.ആര്‍.നാരായണന്‍റെ  ജീവിതം മാറ്റി മറിച്ച  ഗുരുവായിരുന്നു അദ്ദേഹം. ലാസ്കിയുടെ  ശുപാര്‍ശയിലാണ്   നെഹ്റു  അദ്ദേഹത്തെ  വിദേശകാര്യ വകുപ്പില്‍  ജോലിക്കെടുത്തത്.  

Thulavarsham paythozhinjappol

തുലാവര്‍ഷം  പെയ്തൊഴിഞ്ഞപ്പോള്‍

മനസ്സില്‍ അനുഭവങ്ങളും കാഴ്ചകളും വന്നുനിറഞ്ഞ് വീര്‍പ്പുമുട്ടുമ്പോഴാണ് എഴുത്തുകാരനില്‍ നിന്ന് അത് സൃഷ്ടിയായി പുറത്തേക്ക് വരുന്നത്. അതിശക്തമായ ഒരു ലാവാ പ്രവാഹമോ പ്രളയമായി മാറുന്ന ഒരു കുത്തൊഴുക്കോ ആയത് മാറാം. ചിലപ്പോള്‍ ശാന്തമായൊഴുകുന്ന ഒരു നദിയുടെ രീതിയാകാം അതിലുണ്ടാവുക. വൈക്കം മുഹമ്മദ് ബഷീറിന്‍റെ കൃതികളില്‍ നമ്മള്‍ ആ ശാന്തത കാണാറുണ്ട്. ജലോപരിതലത്തിലും ഉള്ളിലുമുള്ള ഓരോ വസ്തുവും വ്യക്തതയോടെ നമുക്ക് കാണാന്‍ കഴിയും. ഒരു ദാര്‍ശനിക ഭാവം ആ എഴുത്തില്‍ ഉണ്ടാകാറുണ്ട്. എന്നാല്‍ ഉറൂബിന്‍റെ രചനകളില്‍ തീവ്രമായ സംഘര്‍ഷങ്ങള്‍ വായനക്കാര്‍ അനുഭവിച്ചറിയും.അത് ഉള്ളില്‍ കിടന്നുനീറും.സാമൂഹിക പ്രശ്നങ്ങളും അതില്  അറിഞ്ഞോ അറിയാതെയോ കക്ഷി ചേരേണ്ടിവരുന്ന വ്യക്തികളും ഈ സംഘര്‍ഷത്തിന്‍റെ ഭാഗമായി തീരുന്നു. എം.മുകുന്ദന്‍റെ രചനകളിലും വ്യക്തിസംഘര്‍ഷം ഗൌരവമായിത്തന്നെ വായനക്കാര്‍ക്ക് അനുഭവപ്പെടും.കേന്ദ്രകഥാപാത്രം മെല്ലെ മെല്ലെ വായനക്കാരിലേക്ക് സന്നിവേശിക്കുന്ന ഒരു രീതിയുണ്ട് അതില്‍.എംടിയുടെ രചനകളിലെ ധിക്കാരിയായ ചെറുപ്പക്കാരനും ആ കാലഘട്ടത്തില്‍ നിലനിന്ന സംവിധാനങ്ങളെ വെല്ലുവിളിക്കുകയാണുണ്ടായത്.

എല്ലാ എഴുത്തുകാരും അവരുടെ ആത്മാശം ചാലിച്ച് കഥാപാത്രങ്ങളെ രൂപപ്പെടുത്തുമ്പോള് താന്‍ എന്നോ കണ്ടുപരിചയിച്ച പല വ്യക്തികളുടെ ഒരു നിറക്കൂട്ടുതന്നെ മിശ്രിതമാക്കുകയും രചനയ്ക്ക് ഉപയുക്തമാക്കുകയുമാണ് ചെയ്യുന്നത്. അറിഞ്ഞോ അറിയാതെയോ ഓര്‍മ്മകളില്‍ തങ്ങിക്കിടക്കുന്ന ബിംബങ്ങള്‍ പേനത്തുമ്പിലൂടെ പ്രവഹിക്കുന്നു എന്നുപറയുന്നതാവും ഏറെ ശരി.സന്ദര്ഭങ്ങളും കഥാപാത്രങ്ങളും ആവര്‍ത്തിച്ചുവരുന്ന ജീവന്‍റെ തനിയാവര്‍ത്തനങ്ങളാണ് ഭൂമിയുടെ സംഭാവന എന്നു പറയാം.ആദി കവിയുടെ കഥ മുതല്‍ ഏറ്റവും ആധുനികമായ കഥ വരെ ഉയര്‍ത്തിക്കാട്ടുന്ന മൂല്യങ്ങളും ധര്‍മ്മങ്ങളും അധാര്‍മ്മികതയും അധികാരവും അടിച്ചമര്‍ത്തലുമെല്ലാം സമാനതയുള്ളവയാണ്. അവ അവതരിപ്പിക്കുന്ന രീതിയിലാണ് ,ശൈലിയിലാണ് മാറ്റം കാണുന്നത്.കാവാലം മാധവന്‍കുട്ടിയുടെ “തുലാവര്‍ഷം പെയ്തൊഴിഞ്ഞപ്പോള്‍” എന്ന നോവലും ഇതിനൊരപവാദമല്ല.

തീവ്രമായ ജീവിതാനുഭവങ്ങളും ജന്മത്തിനും മരണത്തിനുമിടയിലുള്ള അനിശ്ചിതമായ യാത്രയും മനോഹരമായി ചിത്രീകരിക്കുന്ന ഒരു നോവലാണ് തുലാവര്‍ഷം പെയ്തൊഴിഞ്ഞപ്പോള്‍. ഇതിലെ കേന്ദ്രകഥാപാത്രം തന്നെയാണ് കഥ പറയുന്നയാള്‍. അതുകൊണ്ടുതന്നെ ആ വ്യക്തിക്ക് പേരില്ല. പേരിനും അപ്പുറം ഉയര്‍ന്നു നില്ക്കുന്ന ഒരു ശില്പ്പമായി അയാളെ വളര്‍ത്തിയെടുക്കാന്‍ നോവലിസ്റ്റിന് കഴിഞ്ഞിട്ടുണ്ട്. ജീവിതം മുള്ളുനിറഞ്ഞ ഒരു ദുര്‍ഘട പാതയാണെന്നും എപ്പോഴും കൊത്താന്‍ തയ്യാറായി നില്ക്കുന്ന വിഷപ്പാമ്പുകള്‍ പാതയ്ക്കിരുവശവുമുണ്ടെന്നും ബോധ്യപ്പെടുത്തുന്ന അനുഭവങ്ങളെയും അവിടെ ആശ്വാസമഴയായി വന്നുചേരുന്ന കുറെ വ്യക്തിത്വങ്ങളെയും കോര്‍ത്തിണക്കിയാണ് നോവലിസ്റ്റ് കഥ പറയുന്നത്. ചെയ്യാത്ത തെറ്റിന് അവഹേളിക്കപ്പെട്ട് വീടും നാടും ഉപേക്ഷിക്കേണ്ടി വരുന്ന ഒരു യുവാവിനുണ്ടാകുന്ന വ്യഥകള്‍, പ്രിയ കാമുകിയെ ഉപേക്ഷിക്കേണ്ടി വരുന്ന ഒരു പ്രണയാതുരന്‍റെ  നൊമ്പരങ്ങള്‍,തുടര്‍ന്നുള്ള ജീവിതം നല്കുന്ന പാഠങ്ങള്‍ ഒക്കെയും വായനയുടെ രസച്ചരടുപൊട്ടാതെ അവതരിപ്പിക്കുന്നുണ്ട് എഴുത്തുകാരന്‍. ആശ്രമത്തില്‍ എത്തപ്പെടുന്ന മുഹൂര്‍ത്തത്തില്‍ നിന്നും പിറകോട്ടുള്ള സഞ്ചാരമായാണ്  കഥ പറയുന്നത്. നന്മയുള്ള ഒരുപാട് മനുഷ്യരെയും സന്ദര്ഭങ്ങളെയും നോവലിസ്റ്റ് വിവരിക്കുന്നുണ്ട്. കാലം കൈയ്യൊപ്പുചാര്‍ത്തിയ അനുഭവങ്ങള്‍ക്ക് നിറം പിടിപ്പിച്ച ആലങ്കാരികതകളില്ലാതെ , ചിന്തേരിടാതെ ,സത്യസന്ധമായ വിവരണം നല്കാനാണ് മാധവന്‍കുട്ടി ശ്രമിച്ചിട്ടുള്ളത്. അതില്‍ വിജയിക്കുകയും ചെയ്തു.

മാധവന്‍കുട്ടി എഴുതിയ ഗുരുദേവന്‍റെ ജീവിതം പ്രമേയമായ നോവല്‍ “കാലത്തിന്‍റെ കൈയ്യൊപ്പ്” മഹാനായ ഒരു ദാര്‍ശനികന്‍ എങ്ങിനെ ഒരു സാധാരണ മനുഷ്യനില്‍ നിന്നും ഉയിര്‍ത്തെഴുന്നേറ്റു എന്ന് നമ്മെ അറിയിക്കുന്നുണ്ട്. ആ ദര്‍ശനം ഇവിടെയും നമുക്ക് കാണാന്‍ കഴിയും. മനഃശാസ്ത്രപരമായും ആധ്യാത്മികമായും ദാര്‍ശനികമായും വ്യക്തിജീവിതത്തെ മനസിലാക്കി അപഗ്രഥിച്ച് നോവലിലൂടെ പ്രകാശിപ്പിക്കുക എന്ന ബുദ്ധിമുട്ടേറിയ ജോലി കാവാലം മാധവന്‍കുട്ടി ഇവിടെ സമര്‍ത്ഥമായി നിര്‍വ്വഹിച്ചിരിക്കുന്നു. ഭാഷയുടെ ലാളിത്യവും കഥാസന്ദര്‍ഭങ്ങള്‍ ഉണര്‍ത്തുന്ന ഉദ്യോഗവുമാണ് ഈ സൃഷ്ടിയുടെ പ്രത്യേകതകള്‍. വായിച്ചുകഴിയുമ്പോള്‍  കേന്ദ്രകഥാപാത്രം നമുക്കൊപ്പം സഞ്ചരിക്കാന് തുടങ്ങുന്നു എന്നതുതന്നെ നോവലിന്‍റെ  ശക്തിയായി കാണാവുന്നതാണ്.

സ്ത്രീകഥാപാത്രങ്ങള്‍ക്ക് വളരെ തെളിമയുള്ള എഴുത്താണ് മാധവന്‍കുട്ടിയുടേത്. റാക്കമ്മയും ദേവയാനിയും കാര്‍ത്ത്യായനിയും അമ്മാളുവമ്മയുമെല്ലാം പച്ചയായ മനുഷ്യരാണ്. കാമം,ക്രോധം,സ്നേഹം,വാത്സല്യം ഒക്കെയും ചേര്ന്നാണ് സൃഷ്ടിയെന്നും അതിനെ അതിജീവിക്കാന്‍ അപൂര്‍വ്വംപേര്‍ക്കെ കഴിയൂ എന്നും എഴുത്തുകാരന്‍ നമ്മെ ഓര്‍മ്മപ്പെടുത്തുന്നു.പാരായണസുഖം നല്കുന്ന ഒരു നല്ല സൃഷ്ടിതന്നെയാണ് കാവാലം മാധവന്‍കുട്ടിയുടെ “തുലാവര്‍ഷം പെയ്തൊഴിഞ്ഞപ്പോള്‍”.

And Quiet Flows the Don

ഡോണ്‍  ശാന്തമായൊഴുകുന്നു

പ്രസിദ്ധ റഷ്യന്‍ എഴുത്തുകാരന്‍  മിഖായേല്‍ ഷോളഖോവിന്‍റെ “ ഡോണ്‍ ശാന്തമായൊഴുകുന്നു “എന്ന കൃതി സാര്‍ ചക്രവര്‍ത്തിയുടെ കാലം,ഒന്നാം ലോക മഹായുദ്ധം,യുദ്ധത്തെത്തുടര്‍ന്നുള്ള ആഭ്യന്നതര യുദ്ധം എന്നിവയിലൂടെ കടന്നുപോകുന്ന പ്രസിദ്ധമായ നോവലാണ്. രാഷ്ട്രീയ പരിവര്‍ത്തനങ്ങള്‍ക്കൊപ്പം ഗ്രാമത്തിലെ കര്‍ഷക ജീവിതം,പ്രണയം,കലഹം,പക,ക്രൂരത എന്നിവയൊക്കെയും മനോഹരമായി ചിത്രീകരിക്കുന്ന ഒരു രചനയാണിത്.

നോവലിന്‍റെ ആദ്യ ഭാഗങ്ങള്‍ ഡോണ്‍ നദിയുടെ തീരത്തുള്ള ഗ്രാമത്തിന്‍റെ മനോഹരമായ വിവരണത്തിലൂടെയും അവിടത്തെ കര്‍ഷക ജീവിതത്തിന്‍റെ വര്‍ണ്ണനകളിലൂടെയും അതീവഹൃദ്യമായ ഒരനുഭവം വായനക്കാരന് നല്കുന്നു. മിഖായല്‍ 1928ലാണ് “And Quiet Flows The Don” എഴുതിയത്. ഒക്ടോബര്‍ വിപ്ലവത്തിനെ തുടര്‍ന്നുണ്ടായ ഭീകരമായ സഹനത്തിന്‍റെ കഥയാണ് അവസാനഭാഗം.

ആത്മകഥാംശം നിലനില്ക്കുന്ന ഒരു നോവലാണിത്. ഡോണ്‍ സമതലത്തിലെ വിയഷെന്‍സ്കാ ഗ്രാമത്തിലാണ് മിഖായേല്‍ 1905ല്‍ ജനിച്ചത്. അദ്ദേഹത്തിന്‍റെ അമ്മവീട്ടുകാര്‍ ടര്‍ക്കിയില്‍ നിന്നുള്ള യുദ്ധത്തടവുകാരായിരുന്നു. ഒന്നാം ലോകമഹായുദ്ധകാലത്തെ ജര്‍മ്മനാക്രമണം താറുമാറാക്കിയ വിദ്യാഭ്യാസം,തുടര്‍ന്ന് യുദ്ധത്തിലുള്ള സജീവ ഇടപെടല്‍, പതിനാറാം വയസ്സില്‍ സമരത്തിനിറങ്ങി. ഒക്ടോബര്‍ വിപ്ലവത്തിന് ശേഷം നടന്ന ആഭ്യന്തര കലാപകാലത്ത് ലഹളക്കാരെ അടിച്ചമര്‍ത്താനും മിഖായല്‍ ഉണ്ടായിരുന്നു. ഡോണ്‍ കൊസാക്കുകളുടെ ജീവിതമാണ് നോവലിന്‍റെ തന്തു. 14 വര്‍ഷം കൊണ്ടാണ് രചന നടത്തിയത്. വിപ്ലവകാലത്ത് പെട്രോഗ്രാഡിനെതിരായി നടന്ന ആക്രമണങ്ങളില്‍ കൊസാക്കുകളുടെ പങ്കാളിത്തം നന്നായി ചിത്രീകരിച്ചിട്ടുണ്ട് നോവലില്‍. റഷ്യയുടെയും ടാര്‍ട്ടാര്‍  ഭൂമികളുടെയും ഇടയിലെ തര്‍ക്കഭൂമിയില്‍ ഇരുകൂട്ടര്‍ക്കും വഴങ്ങാതെ ,സൌകര്യം കിട്ടുന്നവരെ കൊള്ളയടിച്ചുകൊണ്ട് സ്വതന്ത്രരായി വിഹരിച്ചിരുന്ന സമൂഹമാണ് കൊസാക്കുകള്‍.ശത്രുവിനെ നേരിടാന്‍ അതിസമര്‍ത്ഥരായിരുന്നു ഇവര്‍.എന്നാല്‍ സ്വതന്ത്രചിന്താഗതിക്കാരായ ഇവരെ നിയന്ത്രിക്കാന്‍ കഴിയാതെ വന്ന സാഹചര്യത്തില്‍ സര്‍ക്കാര്‍ അമര്‍ച്ച ചെയ്തു. പലരേയും നാടുകടത്തി.സാമൂഹ്യസമത്വം നഷ്ടപ്പെട്ട ഇവരുടെയിടയില്‍ ജന്മിത്വസമ്പ്രദായം നിലവില്‍ വന്നു. സാധാരണ കൊസാക്കുകള്‍ കൂലിപ്പാട്ടാളക്കാരായി മാറി. പൊതു ഉടമയിലുള്ള ഭൂമിയില്‍ കൃഷിചെയ്യുന്നതിന് ഇവര്‍ക്ക് നികുതി കൊടുക്കേണ്ടിയിരുന്നില്ല. പകരം അടിയന്തിരഘട്ടങ്ങളില്‍ യുദ്ധം ചെയ്യാന്‍ പോകേണ്ടിവന്നു. ജനകീയ പ്രക്ഷോഭങ്ങള്‍ അടിച്ചമര്‍ത്താന്‍ സര്‍ക്കാര്‍ കൊസാക്കുകളെ ഉപയോഗിച്ചു . 1905ലും 1914-18ലും നടന്ന യുദ്ധങ്ങള്‍ കഥാകാരന്‍ വിവരിക്കുന്നുണ്ട്.

ഗ്രിഗര് മെല്‍ക്കോവും സ്റ്റീഫന്‍റെ ഭാര്യയായ അക്സീനിയയും തമ്മിലുള്ള പ്രേമമാണ് നോവലിന്‍റെ നട്ടെല്ല്. അവസാനഭാഗത്ത് പ്രണയം യുദ്ധത്തിന് വഴിമാറുന്നു. 1914-1917ലെ റൂസ്സോ-ജര്‍മ്മന്‍ സമരവും തുടര്‍ന്നുണ്ടായ ഒക്ടോബര്‍ വിപ്ലവും 1918-21ലെ ആഭ്യന്തര സമരവുമാണ് ഇവിടെ പ്രതിപാദിക്കുന്നത്. മലയാളി വായനക്കാര്‍ക്ക് അപരിചിതമായ ഒരു മേഖലയില്‍ നടന്ന യുദ്ധം എന്ന നിലയില്‍ ഈ ഭാഗം വായിച്ചു മനസ്സിലാക്കാന്‍ കുറച്ചുപ്രയാസമാണ്.

1941ല്‍ നാസികള്‍ റഷ്യ ആക്രമിച്ചപ്പോള്‍ ഒരു സമരലേഖകനായി ഷൊളോഖോവ് മുന്നണിയിലുണ്ടായിരുന്നു. ഗ്രാമവസതിയില്‍ താമസിച്ചിരുന്ന സ്വമാതാവ് ,ശത്രുവിന്‍റെ ബോംബിനിരയായ വസ്തുത സമരമുഖത്തുവച്ചാണ് അദ്ദേഹം അറിയുന്നത്. അതെല്ലാം നോവലിന്‍റെ രചന തീവ്രത വര്‍ദ്ധിപ്പിച്ചിട്ടുണ്ട്.

നായാട്ടും മീന്‍പിടുത്തവും ഗ്രാമീണ ജീവിതവും സഹജീവിസ്നേഹവും ഒത്തുചേര്‍ന്ന എഴുത്തുകാരന്‍റെ ,രചനയിലും അവയുടെ വിവരണങ്ങള്‍ നമുക്ക് കാണാന്‍ കഴിയും.

മാത്യൂ ലൂക്കാണ് വിവര്‍ത്തനം ചെയ്തിരിക്കുന്നത്. പുതിയ കാല വിവര്‍ത്തനങ്ങളേക്കാള്  മനോഹരമാണ് ലൂക്കിന്‍റെ രചനാ രീതി. സാഹിത്യ പ്രവര്‍ത്തക സഹകരണ സംഘമാണ് പ്രസിദ്ധീകരിച്ചിരിക്കുന്നത്.