സ്വാതിതിരുനാള്
ഡോക്ടര് ശൂരനാട്ടു കുഞ്ഞന് പിള്ള എഴുതി കേരള സര്ക്കാരിന്റെ സാംസ്ക്കാരിക പ്രസിദ്ധീകരണ വകുപ്പ് പുറത്തിറക്കിയ ഗ്രന്ഥമാണ് സ്വാതി തിരുനാള്.. ഇംഗ്ലീഷില് തയ്യാറാക്കിയ നല്ലൊരാമുഖമാണ് ഇതിന്റെ ഒന്നാമത്തെ പ്രത്യേകത. രാജഭരണ കാലത്ത് ജനിച്ച വ്യക്തി എന്ന നിലയില് ഗ്രന്ഥകര്ത്താവ് കൂടുതല് ഭവ്യതയുള്ള ഭാഷയാണ് ഉപയോഗിച്ചിട്ടുള്ളത് എന്ന ഒരു ന്യൂനതയും ചൂണ്ടിക്കാട്ടാം. ജനനവും ശൈശവവും എന്നു പറയാവുന്ന ഒന്നാം അദ്ധ്യായത്തിന്റെ തലക്കെട്ടുതന്നെ തിരു അവതാരവും ശൈശവവും എന്നാണ്.
രാജഭക്തിയുടെ ഭാഗമായുള്ള ആലങ്കാരിക ഭാഷയാണ് ഉപയോഗിച്ചിട്ടുള്ളതെങ്കിലും വളരെ കൃത്യമായി ചരിത്രം എഴുതിയിട്ടുണ്ട് കുഞ്ഞന് പിള്ള സാര്. അന്ന് രാജാധികാരത്തില് വന്നു ചേര്ന്ന നിയന്ത്രണം, തിരുവിതാംകൂറിന് മേല് ബ്രിട്ടീഷുകാര്ക്കുണ്ടായിരുന്ന മേല്ക്കോയ്മ, രാജ്ഞിമാരുടെ ഭരണം, തുടര്ന്ന് സ്വാതി തിരുനാളിന്റെ വരവ്, അദ്ദേഹവും റസിഡന്റ്മാരുമായുണ്ടായ അകല്ച്ചയും അതുയര്ത്തിയ ഭരണപരമായ പ്രശ്നങ്ങളും ഒക്കെ നന്നായി വിവരിച്ചിട്ടുണ്ട് ഈ പുസ്തകത്തില്.. അധികാരവുമായി ബന്ധപ്പെട്ട മുഷ്ക്കുകള് ഭരണത്തെ എങ്ങിനെ ബാധിക്കുമെന്നത് ഗ്രന്ഥകാരന് നമുക്ക് മനസ്സിലാക്കിത്തരുന്നു.
രോഗിയായ രാജാവ് ഭരണത്തിലുള്ള ശ്രദ്ധ വിട്ട് പൂര്ണ്ണ ഭക്തനായി മാറുന്ന ഭാഗം സ്വാതിതിരുനാളിനോടുണ്ടായിരുന്ന ബഹുമാനം കുറച്ചു എന്നു പറയാതെ വയ്യ. രാജ്യഭരണത്തിനുതകേണ്ട പണം പത്മനാഭന് നിവേദ്യമാക്കിയതിന്റെയും ആഡംബരങ്ങള്ക്കും നൃത്ത സംഗീതാദികള്ക്കും അമിതമായി ചിലവാക്കിയതിന്റെയും കണക്കുകള് കാണുമ്പോള് സ്വാതി തിരുനാളിനെ കുറിച്ചുണ്ടായിരുന്ന അഭിമാനം കുറഞ്ഞു എന്നത് മറ്റൊരു സത്യം. കുറച്ചൊക്കെ പുരോഗമന പ്രവര്ത്തനങ്ങളും നടന്നു എന്നേ പറയാന് കഴിയൂ. കലാപോഷണം, സംഗീതകൃതികളുടെ രചന എന്നിവയാണ് സ്വാതിയെ കീര്ത്തിമാനാക്കിയതെന്നും നല്ല ഭരണാധികാരി എന്ന നിലയിലല്ലെന്നും തുറന്നു പറയാതെ തന്നെ പറയാന് ഗ്രന്ഥകാരന് കഴിഞ്ഞിട്ടുണ്ട്. തിരുവിതാംകൂര് ചരിത്രം അറിയാന് ആഗ്രഹിക്കുന്നവര്ക്ക് ഏറെ പ്രയോജനകരമാണ് ഈ പുസ്തകം.
No comments:
Post a Comment